Thursday, December 2, 2010

बखत नि मिल

यसि दौडी जिन्दगी, कि रुकणक बखत नि मिल,
खुशी भौत मिलीं, पर हंसणक बखत नि मिल।

मील लै सजे राखीं ’दी’  घर मैं आपण,
सिलाई  जलूणक पर बखत नि मिल।

जैकें चाण मै हरै गोइं, खुद भीड मैं मि,
ऊ सामणी छी  मिलणक बखत नि मिल।

मुरझै गेइं ऊं सब फ़ूल, जो छी  इन्तजार में,
हम कानां मै उलझी रयुं और बखत नि मिल।

जीवनक दौड मै जिन्दगी बिते दे,
कभैं जिन्दगी क जीणक बखत नि मिल।

खुशी भौत मिलीं जीवन मैं,
हंसणक पर बखत नि मिल।
           ....................मदन मोहन बिष्ट

Sunday, November 28, 2010

प्यार झन करिया

  
 प्यार झन करिया
  कैहाल छी मील पैलीकै,  म्यर खयाल झन करिया,
  लोग बाग जे लै कौल, तुम सवाल झन करिया।
  हैगो म्यार दगाड पैली लै, योस कत्तू बखत,
  यो बार तुम लै, के बबाल झन करिया ॥
  न्है जाया आपण बाट इकलै चाहे तुम,
  हिटन बाट बैठ बे, म्यार इन्तजार झन करिया।
  बगि गोइं गध्यारों मैं, आंसुवोंक पैली लै, भौत बार,
  तुम लै इस्तेमाल, यो हथियार झन करिया ॥
  दबै बे सिरानिक ताव मेरि फोटो, मेरि नीन हराम झन करिया,
  प्यास मर गे बिल्कुल मेरि आब, पेश मिकै तुम जाम झन करिया।
  आपण ऎब छुपूणक खातिर,  किस्स म्यार आम झन करिया,
  नाम उसी लै है सकूं दुनि मैं तुमर , खाल्लि मिकैं बदनाम झन करिया ॥
  कर लिया कतुक लै चोट दिल पे हमार, हमुकैं मन्जूर छू ’मदन’
  प्यार आब बिछीन हैगो हमुकैं, हमार दगड प्यार झन करिया॥
........मदन मोहन बिष्ट........

Saturday, November 27, 2010

जिन्दगी जी हाली

लोग सात जनम साथ निभोणक बात करनी,
मील तो थ्वाड देर मै ही जिन्दगी  जी हाली।
त्यर यादों कैं भुलै बेर खुदै सम्भल गोइं मी,
पर तील मिलते ही किलै आंख  झुकै हाली।
घरोंदा बडूंण में सदियो बै लागि छन लोग
जो उजड जां मिनटों में,
तील तो मिनटों मैं फ़िर दुनियां सजै हाली।
म्यर स्वैणों मै सिर्फ़ और सिर्फ़ तू ऊंछी,
हमूल आब नीन लै आपणि दुश्मन बणै हाली।
लोग सात जनम साथ निभोणक बात करनी,
मील तो थ्वाड देर मै ही जिन्दगी  जी हाली।
......................मदन मोहन बिष्ट

Thursday, November 25, 2010

समय

कभैं सुखल गुजरौ कभैं दुखल गुजरौ,
जौस लै गुजरौ समय भौल गुजरौ।

पोरुं तक  बचपन छी, बेइ तक जवानी,
लागण नि रोय यू आखां में इतु समय गुजरौ॥

बहुत कोशिश करी, करूं मुट्ठी में पर कतु  पकड़ पांई,
म्यर सामणी बै यूँ समय गुजरौ।

झपकौंण पलकों कैं और सितण आँखोंक जरूरी छी,
हमेशा खुली आँखांल कैक समय गुजरौ॥

ऊं डाव बोठों पर ऎ गैई आई नयी पात,
जनर पतझड मै बहौत बुर बखत गुजरौ !

आज उमर बितणक बाद योस लागणों,
जाणि कास कास कामौं मैं हमर समय गुजरौ॥
......................मदन मोहन बिष्ट

भौत देर तक....

साथ नि्भै नि पाइ ऊ भोत देर तक,
पर मिकैं भुल नि पाल ऊ भोत देर तक।
जब लै बैठोल पास वीक  क्वे,
म्यरै किस्स सुणाल उकैं भौत देर तक।
मि लै हर एक मै मुखड देखुल वीक,
ऊन जानै ऊ लै मिकैं चाल भौत देर तक।
कौस हाल मै छिन वां बै जाई बाद मि,
सुण बे यकीन नि आल उकैं भौत देर तक।
..............................मदन मोहन बिष्ट

Thursday, October 21, 2010

एहसास

By Madan Mohan Bisht 
फ़ोटो चिट्ठी फ़ाड देईं खुद, हमार जैल सब रात्ती पै,
ब्याव हूण पर उठै ल्येगै फ़िर, चिथाड-मिथाड जाणि कत्ति बै।

झन आइया तुम नजर हमूंकैं, गुस्सम य़ां तक कै दे वील,
नि देख्यूं जो चार दिन तो लगंण चार कर हालीं वील।

कभैं फ़िर ना बात करुल आब, कसम उनूल यो खाई छी,
साथ नि छोडुल कभैं तुमर, आब यसि सौगन्ध उठाई छू।

Friday, October 15, 2010

पुकार

by Madan Mohan Bisht on Wednesday, September 1, 2010 at 10:46pm
 
उठ पहाडक नौजवान आब त हैजा तू तैयार, डाना काना भिड़ा स्यरा तिकणी रईं पुकार;
सेई रोछे सालों बटी गवें हैली दिन हजार, बिडी फूंकी तास खेला डोई रून्छे सार बाज़ार l

कम पड़ी बाबु त्यारा कसी दिल्ली गेई; सालों खटी परदेशा तिकें पडे गेई;
ढुंग सारीं बौल करों कसिके कमायो, ईजे ले लगण करीं, तिकणी खवायो l

मुस मारूं चां न्हाती ख़ाली छिना ड्वाक भकार,छानी ले निदोणी हैगे लागी रूंछी जां कतार,
डाड मारी आखी खोई इज हैगे तेरी बीमार, जब बाटी बाबु गेई दुःख रूनी खुट पसार l

कुछ कर काम च्याला बण ना तू यूँ बेकार, पड़ी लिखी लौंड छै तू काम छिना यें हजार,
गाड़ भिड़ा कमै खा या पडा नान्तिन द्वि चार, के होलो आघिल त्योरो कर मणि यो बिचार l

फूल फल भोते हूनी  पड जानी सब बेकार, एकबट्टा भैर भेज डबल कमा द्वि-चार,
कुड़ी छानी छाई जाला, डबल आला द्वि-चार, दवाई इजकी होली पड़ी रोली ना बीमार l

ब्योली ल्याले खुश रोलै, खुश रोली इजा, दुखी छि उमर भरी ऊंके ख़ुशी दीजा,
उठ पहाडक नौजवान आब त हैजा तू तैयार, डाना काना भिड़ा स्यरा तिकणी रईं पुकार l

....................एम् एम् बिष्ट

Tuesday, September 28, 2010

जनमबार

पत्त नै किलै लोग जनम्बार मनूनी,         
इष्ट मित्र लै मिल बे खूब कौतिक लगूनी,           
योस के करो जाणि साल भर वील,                   
जो भकार भर जानी गिफ़्ट और बधाईल।

इन्सान लै आब खूबै समझदार हैगो,        
जाणूं येक जीवन आब एक साल कम रैगो,     
तब्बै खुशीयोंक दी जलूणक रिवाज आब न्हैगो,       
जनमबारे दिन मोमबत्ती बुझोंणक चलन हैगो।                 

जिन्दगी त्यर एक साल आइ कम हैगो,        
पत्त नै कतु टैम  त्यर यां आइ रैगो,                 
धपोड्लै जब केक तू जनमबार पर,            
झन भुलिये वां बैठ रौ क्वे त्यर इन्तजार पर।      

आपण सब्बै करनी, दुसरों लिजि लै कुछ कर जा, 
आघिल पिछ्याडि जाण सबूल छू  भल कर बे, बेशक आघिल न्है जा,         
मरी बाद लै लोग मनाल त्यर जनम्बार ,             
ज्योन छिना भाल काम यास करजा  द्वि चार।

ज्योन छिना भाल काम करजालै द्वि-चार,
जाण बाद लै मनाल लोग त्यर जनम्बार हर बार।             
 ...........................................................................मदन मोहन बिष्ट

Friday, September 24, 2010

यौस झन समझिया मिं डरुणई....

क्वे लूंण रव्टल पेट भरर्णों,
क्वे कुकुड़ तितिर खैबै लै भुक्कै रूणों,
कुकुड़ तितिर ऑब बिलुप्तीक कगार पर छिन,
लोग तुमुन्कौ लै चै रयी, बच बे रया, .....यौस झन समझिया मिं डरुणई

गरीब नवाज लौकि आब पहुँच बे दूर न्हे गे,
जब बे जूसक चलन चलौ, लौकि लै VIP हैगे.
गदू, कर्याल लै रिशार थै रिशाई रिशाई जा छिन,
सोचो के बणाला के खाला, ....यौस झन समझिया मिं डरुणई

राजा महाराजा न्हे गेईं, आब मन्त्री सन्त्री ऐ गेईं.
पेट भरणक मजबूरी छु, चारा, सूटकेस, सड़क सब खाण लै रयी,
समान तुमर पास लै छु वीक सुरक्ष्याक तुम खुद जिम्मेदार छा, .....यौस झन समझिया मिं डरुणई

टीवी पर, मंच पर अधनंग मैंस पोज बणे बणे बे कशरत सिखूणई,
सब देखा देख उस्से करण लाग रईं,
उधिन के हौल जब सैणी उस्से सिखूँण लागल,
टीवी कं या नान्तिना कं, कैकं लुकाला, .....यौस झन समझिया मिं डरुणई....

पेंटिंग लगे बे, घंटी टांगी बे अशुभ कं शुभ करण लागि रयी,
क्वे दरौज तोड़ बेर वां गड्ड करण लाग रईं,
के हौल जब क्वे बताल घर मैं सितण, गिज़ाबाट खाण अशुभ हूँ,
कां रौला, कसी खाला, ......यौस झन समझिया मिं डरुणई l

पैल बखत यमदूत भैंस में ऊंछी, ऊन उनैं टैम लागि जांछी ,
आपण जिम्मेदारी निभे बे आदिम वीक बाट चै रूंछि,
आब स्पीडक जमान हैगो, यमदूतोंल लै जीप ट्रक ली हांली,
घर-घर जै निसकन बाट घट्टे टिप लि जानी,
भली कै जाया सड़क पर, तुम लै जाँ छा, ...यौस झन समझिया मिं डरुणई l

(एम्. एम्. बिष्ट)

Saturday, September 18, 2010

यादें

यादें

बादल उमडता घुमडता सा इक दिन,
चला आया छ्त पर जहां मैं खडा था;      
उम्मीद मेरी वो बरसेगा जम के,          
इलाके मैं सालों से सूखा पडा था ।

उडा ना वो बरसा, गरजने लगा पर,    
छ्त पर, मेरे काफ़ी नजदीक आकर;         
डरा सा,  निकलने लगा जो मैं छ्त से,     
रोका मुझे उसने आवाज देकर ।   

कडकते-चमकते मगर प्यार से फ़िर,   
बूंदों कि ममता से मुझको भिगाया;
अचम्भित  हुआ ’सूखी छ्त, तरबतर मैं’!,  
कुदरत ने कैसा करिष्मा दिखाया ।  

बतलाया बादल ने, जाता हिमालय वो,    
सागर से पानी की बुंदें उडाकर;          
देवों कि भूमि को करके नमन,   
लौटा वापिस, पहाडों को पानी पिलाकर ।

तभी रास्ते मैं, मेरे बीच आकर,        
मुझे एक ऊंची पहाडी ने रोका;     
बोला दुखी सा, उड्ते हो जग मैं,
तुमने कभी मेरे साथी को देखा ।

ढलती हुई सी उमर का वो होगा,  
दिखता है कैसा ये मुझको पता नहीं;   
बचपन मैं खेला था गोदी मैं मेरी,
बरसों हुऎ, फ़िर मुझसे मिला नही ।   

सुना है कहीं रहता नीचे, मैदानों मैं,
मिलैं भी तो कैसे, हम जड हैं अचल हैं;  
मिले जो कभी तुमको,खिड्की या छत पर,   
बतलाना हम भी अजर ना अमर हैं ।

कब ये लुढक कर चली जाये नीचे,   
तन कर अभी तक जो चोटी खडी है;   
मिले जख्म इतने,मुझे अपनों से ही,   
चुप हूं मगर दिल मैं पीडा बडी है ।   

वो खिड्की वो चौखट वो झूले वो रस्ते,   
तुम्हैं देखा था जिसने गिरते सम्भल्ते;    
उन्हे याद तुम्हारे बचपन कि बातें,   
चले क्यों नही उनसे मिलने को जाते।   

घनी धूप मैं अपने पत्तों के दामन से,    
ममता लुटा कर तुम्हैं था सुलाया;   
उन डालों व पत्तों ने पतझड से लडते,   
तुम्हैं याद कर अपना जीवन लुटाया ।    

वो चिडिया भी तकती, वो तितली भी रोती,   
जो हंसना सिखाती थी बचपन मैं तुझको;   
चले जाओ गांव मैं, ऊचे पहाडों मैं,
रोकें ना फ़िर वो, दुखी: होके मुझको ।   

बादल ने यादों को फ़िर से जगाया,    
जी रहा था मैं अब तक, जो बातें भुला के;
इठ्लाता बादल, गया उड वहां से,
बचपन कि यादों से मुझको रुला के ।   

अब मैं दुखी हूं सुन बादल कि बातें,   
बेचैन दिन मैं हुं,बोझिल हैं रातें;    
लग जांये पन्ख चला जांऊ उड के,   
अगर बस चले तो ना आउंगा मुड के।
अगर बस चले तो ना आउंगा मुड के।
.................................. मदन मोहन बिष्ट

Wednesday, September 15, 2010

स्वागतम

This Blog  is dedicated to all kumouni friends those who love kumoun, kumouni culture, customs, and language. specially my friends who are residing out of kumoun and eager to know more about kumoun and wants to share their views in concern.
उन सभी मित्रों का यहां मैं स्वागत करता हूं जो  कुमाउंनी भाषा, रीति रिवाज एवम संस्क्रृति से प्यार करते हैं। उन मित्रों को विशेष आमन्त्रण जो दूरस्थ स्थानों पर रहते हैं और अपनी संस्क्रृति से जुडे रहना चाहते हैं
दोस्तो  परिस्थिति वश हम आपण गौं गाड है दूर देश विदेश बसि गोइं, लेकिन आपण पहाड पन बिताई बचपनाक दिन जब याद ऊनी दिल मै कसक जै उठैं आपन  लोगों दगै आपण मनैकि बात आपण भाषा मैं कूण दिल कैं बहुत शकून पहुंचूं, यो blog  मै तुमर स्वागत छू.