Thursday, February 3, 2011

परिचय


शिब्दाल मिकैं ब्याव आपुं घर मैं बुला,
आपण चारों च्यालां दगै म्यर परिचय करा।
यो ठुल च्यल परकाश छू,
एम ए बीएड पास छू मास्टरीक शौक छी पर बण नि पाय,
आब कस्सि.. लै नौकरीक तलाश छू।
दुसर च्यल हालै में दिल्लि बै ऎ रौ,
के कूनी ऊ.. एमबीएक डिग्री ल्यै रौ।
तिसर तौ दाडि वाव जो लागणौं देवदास,
कम्पूटरेकि क्याप्प.. डिग्री छु तैक पास।
पार ऊ जो पट्याल में भै रौ ऊ सब्बुं है नान च्यल छू,
पढाइ लिखाइ के करि न्हैं, तैक चाऊमीनौक ठ्यल छू।
मील कौ शिबदा.. तकैं घर बे निकालो,
दाज्यू.. आपण घरेकि इज्जत कें सम्भालो।
शिबदाल कौ निकाइ तो तैकं पैलिकै दिंछि ’मदन’, पर तौ भौतै काम ऊं।
बांकि तो सबै यूं बेरोजगार छन, घरक खर्च सब तै तो चलूं ॥
                                               ................................. मदन मोहन बिष्ट, रुद्रपुर